Intervención do presidente da CRMH con motivo da inauguración do Memorial ás vítimas do franquismo

A alocución de Manuel Monge, presidente da Comisión pola Recuperación da Memoria Histórica da Coruña, realizouse o 19 de decembro de 2010 con motivo da inauguración do Memorial “Xérmolos” adicado ás vítimas da represión franquista na Comarca da Coruña.

Camaradas, compañeiras, compañeiros, amigas e amigos:

Xa estamos aquí.

Este 19 de decembro de 2010 pasará á historia como a data en que realizamos un acto de xustiza de reparación. De xustiza porque despois de trinta e tres anos de democracia lembramos e homenaxeamos, con nomes e apelidos,  a 600 persoas de dez concellos da comarca que foron asasinados polo franquismo; a súa morte non foi inútil porque foron “xermolos de paz e liberdade”, como chamamos a este conxunto escultórico, obra de Xosé Val Díaz “Valdi”. É tamén un acto de reparación porque non queremos nin silencio, nin esquecemento.

É hora de dicir a verdade e acabar con ambigüidades vergoñentas. Aquí non houbo Guerra Civil, senón un xenocidio, é dicir, unha eliminación sistemática e planificada de persoas por motivos ideolóxicos e políticos. Estamos, xa que logo, ante crimes contra a humanidade que, segundo o dereito internacional, non prescriben. Aínda queda moito por facer e máis de 100.000 persoas seguen nas cunetas. Dicía o ex–fiscal anticorrupción, Carlos Jiménez Villarejo, que con esas fosas “continúa entre nós a Guerra Civil e a Ditadura”.

Este non un acto de vinganza, nin partidista. Desde a Comisión pola Recuperación da Memoria Histórica da Coruña invitamos a todo o mundo, tamén a todos os grupos municipais, a participar porque queremos un apoio unánime. Os que se automarxinan terán que dar unha explicación.

A homenaxe ás vítimas do franquismo ten un carácter comarcal e queremos agradecer a colaboración dos concellos da Coruña, Arteixo, Bergondo, Cambre, Carral, Oleiros e Sada e a presenza neste acto de alcaldes da comarca e de membros das súas corporacións municipais.

Este Memorial é posíbel pola subvención que nos concedeu o ministerio da Presidencia, pola colaboración da Deputación da Coruña e, sobre todo, pola colaboración institucional que temos co concello da Coruña, que facilitou todas as infraestruturas necesarias. Esa colaboración e apoio queda hoxe patente coa presenza do alcalde da Coruña, Javier Losada. Esperamos que esa colaboración institucional continúe en todas as actividades relacionadas coa recuperación da memoria histórica.

Somos demócratas e xente de paz. Por iso honramos a estas vítimas do franquismo cos versos que presiden este menhir central, do escritor Claudio Rodríguez Fer: “Paz para sempre”.

Amigas e amigos, saúde, terra, mar e República.