Suspendida sen base legal a declaración de Martín Villa e Daniel Aroca por crimes do franquismo no Tribunal de Elda
O próximo 4 de febreiro do presente ano estaban citados a declarar, en calidade de investigados, ante o Tribunal de Instancia de Elda, Rodolfo Martín Villa e Daniel Aroca, no marco da causa penal aberta polo asasinato do mozo Teófilo del Valle, ocorrido o 24 de febreiro de 1976, nun contexto de crimes contra a humanidade.
Aínda que as declaracións estaban previstas para a data indicada anteriormente pola xuíza Dna. Yolanda Julia Candela Quesada, a recente incorporación ao Xulgado do xuíz D. Francisco José Cabrera Montesinos motivou a suspensión das devanditas declaracións. A pedimento da representación procesual de Martín Villa, e mediante Providencia, o maxistrado acordou a suspensión das devanditas declaracións mentres se tramita o recurso de apelación interposto polo propio Martín Villa contra o auto de admisión a trámite da querela criminal presentada por José Antonio del Valle, irmán de Teófilo del Valle.
A Providencia ditada polo xuíz D. Francisco José Cabrera Montesinos con data 28 de xaneiro do presente ano resulta manifestamente contraria a dereito, ao atribuír efecto suspensivo a un recurso de apelación que, conforme á normativa vixente, non o ten. En aplicación da Lei de Axuizamento Criminal, a interposición do devandito recurso non pode nin debe suspender a tramitación da causa e, en consecuencia, tampouco xustificar a suspensión das declaracións que xa foran previamente sinaladas polo Tribunal de Instancia.
Esta resolución xudicial carece dunha motivación xurídica suficiente, é infundada e contraria a dereito, e provoca, unha vez máis, unha situación de absoluto desamparo para José Antonio, así como para o conxunto das vítimas de graves violacións de dereitos humanos cometidas por quen integrou os aparellos represivos da ditadura franquista e que permaneceron inalterados durante a Transición. Atopámonos ante unha decisión que incumpre os estándares internacionais en materia de dereitos humanos e que contribúe a apontoar o modelo de impunidade que o Estado español ven sostendo fronte a estes crimes, en aberta contradición coas súas obrigacións internacionais en materia de verdade, xustiza e reparación.
Ante esta grave situación, a Providencia que suspende as declaracións será recorrida en reforma por José Antonio del Valle, irmán de Teófilo e querelante nesta causa.
Lembramos que Teófilo del Valle foi asasinado pola policía armada cando participaba nunha mobilización do sector do calzado o 24 de febreiro de 1976. Estas mobilizacións eran moi frecuentes, polo que se reprimían con toda a forza do aparello policial do réxime que aínda seguía vivo en perfecta coordinación co Ministerio de Relaciones Sindicales, do que era titular por aquel entón o investigado Rodolfo Martín Villa. Teófilodel Valle é considerado a primeira vítima da Transición española.
Por último, interpelamos:
- Ao Tribunal de Instancia de Elda para que anule a Providencia ditada e sinale unha nova data para a toma de declaración de Martín Villa e Daniel Aroca.
- Á Audiencia Provincial de Alacante para que ratifique a admisión a trámite da querela e, en consecuencia, desestime o recurso de apelación interposto por Martín Villa.
- Ao Goberno e aos diferentes grupos parlamentarios das Cortes Xerais para que adopten todas as medidas lexislativas precisas para reverter, dunha vez por todas, o modelo de impunidade que impera no Estado español e que sistematicamente foi censurado polo Consello de Dereitos Humanos das Nacións Unidas.